بسم الله كه مبدء كائناته‏

بسم الله كه سرچشمه حياته‏

بسم الله كه كليد مشكلاته‏

بسم الله كه شافع عرصاته‏

يك و چار و هفت و يكهزار و يك نوم‏

ته نوم هسّ و ته نوم هرگز نبونه گوم‏

هفت دريو مركّب بووه صد هزار بار

توم بون و ته نوم هسّه كه نبونه توم‏

ذكر يونسى باب مرا ده يارون‏

حاجت بخواهين خدا جواده يارون‏

شكار غافل صيد صيّاده يارون‏

دنيا صيّاد و شيطون شيّاده يارون‏

هر سو رو كمّه نور خدائه يارون‏

اين نور خدا بى‏انتهائه يارون‏

هر ذرّه كه در ارض و سمائه يارون‏

سر تا قدمش صدق و صفائه يارون‏

نما شونه سر چمشك بزو ستاره‏

مره به چشمك‏ها كرده اين اشاره‏

عاشق كه به شو برسيه بى‏قراره‏

بى‏قراره كه گاه ديدار ياره‏

ماه رمضون ماه خداءه يارون‏

ماه روزه و ذكر و دعائه يارون‏

قرآن بخونين شمه شفاءه يارون‏

حاجت بخواهين حاجت رواءه يارون‏

شاه لافتى و هل أتى على‏ئه‏

بعد از مصطفى أمه آقا على‏ئه‏

خزونه علّم الأسماء على‏ئه‏

أى آيينه خدانما علي‏ئه‏

شكار تا غافل نبوءه تير نخورنه‏

و چه تا برمه نكنه شير نخورنه‏

مرد روزگار نامرد دسّه نشنه‏

شاله‏ها كرده شكار ره شير نخورنه‏

توره كه دارمه مال و مناله كورمه‏

زرره كه دارمه سنگ و سفالّه كورمه‏

اونى كه وسّه ياد بايرم باينّه‏

حرف زيادى و قيل و قالّه كورمه‏

اتّا چكّه اوبوين چى‏ها بايّه‏

ريكاء و كيجاء خوش‏نما بايّه‏

صاحب هزارون ادّعا بايّه‏

از قدرت اون جانه خدا بايّه‏

من كي هسّمه كه بووم توره خوامه‏

من چى هسّمه كه بووم ته فدامه‏

شه خودّه كه أشمه اتّا گدامه‏

ته سايه كه مه سر دره پادشامه‏

اوندل كه به ته عشق گرفتار نيه‏

اوندل كه و ته بارره خريدار نيه‏

و شنا سگ پيش دم بدئن خورمه قسم‏

سگ هم وره خوارنى و گنه‏خوار نيه‏

اي ونگ شام اذان بمؤئه مه گوش‏

مه تن بلرزسّ و مه دل بموئه جوش‏

هي روزّه شوكمّي و شوره كمّى روز

ناگهون گننه برو چاركس دوش‏

وضو بيتمه بخونّم شه نمازّه‏

خداءه پيش بورم راز و نيازّه‏

امشو جمعه شو هسّ و اميدوارمه‏

احياها كنم همين شوء درازّه‏

امشوئه تاريكى چنّه مزه داينه‏

مزه شوهاى ماه روزه داينه‏

مه دلّه نمّه امشو چى كارد بوشه‏

انّه آه و ناله داينه و سوزه داينه‏

امشو من چنّه راز و نيازها كنّه‏

چنّه ذكرها كردم و نمازها كنّه‏

تا دل سحر بر سيمه شه دل وا

ديماشه جانه آمى پروازها كنّه‏

بشنو سّمه جام‏جم جهون نمائه‏

جام طلسمى هسّ و گرون بهائه‏

نو نسّمه كه و رمزى از امائه‏

همين هسّه كه خدا مره هدائه‏

جانى كه ته سر نيه صفا نداينه‏

كارى كه ته سر نيه سزا نداينه‏

شاهى كه ته در خنه گدا نبوئه‏

بيچاره بهاى يك گدا نداينه‏

مه دسّه هماس كه زمى گير بايمه‏

مه چك تله دكت و ناگزير بايمه‏

گته مه كه پير بيمه شه كار ره رسمه‏

كاره رس نيمه اسا كه پير بايمه‏

ته تير كه بدل هنيشه چنّه خواره‏

زخمى كه تو بزوئى چى مزه داره‏

دشمن گرمى نرمى چى ناگواره‏

آمى كه تنّي كنّه و نه بلاره‏

كنه پيش بورم حرفى پيداها كنم‏

تا بتونم ته وصف و ثناها كنم‏

اى توشه دونّى چى نازنين وجودى‏

مره لفظ هاده كه من أداها كنم‏

اگر ته مجنون نبوام پس چى بوأم‏

اگر ته قربون نبوام پس چى بوأم‏

اگر ته وسرّ مه جانه خاره همدم‏

در كوه و هامون نبوام پس چى بوأم‏

برزيگر و نّه بديمه بينجه جار

بينجه جارّه و جين كردنه خوار خوار

مره بأوتنه اى جانه برار

شه دكاشته و جين‏ها كن و خوار دار

من نه مرد اين ورو نه مرد اونور هسّمه‏

من گرفتار دل و شه جانه دلبر هسّمه‏

من بيمه اتّا كلو او دكته پيته زغال‏

شكر كمّه كه اسا خورشيد خاور هسّمه‏

تا شه خودّه بر كنارها كردمه از گيرودار

پادشاه اقتدار هفت كشور هسّمه‏

تو شه خودّه اشنى نونى كى هسّى اى برار

من شه خودّه اشمه و يمّه كه محشر هسّمه‏

لطف اون جانه خدا هسّه كه در درياى علم‏

هم كه كشتى هم كه لنگر هم كه بندر هسّمه‏

دين پاك مصطفى ره به علىّ مرتضى‏

هم سپاه و هم سلاح و هم كه سنگر هسّمه‏

نصف شو كه پرسمه گيرمه وضو خومّه نماز

كمّه چى پروازها با اين كه بى‏پر هسّمه‏

شو كه بيّه شوپر هرور خوانه شونه پرزنون‏

جانه آمي من مگر كمتر ز شوپر هسّمه‏

خوانى از سرّ حسن سر در بيارى دون كه من‏

بنده فرمونبر آل پيمبر هسّمه‏

متاع عشق چى بازار داينه‏

خريدارون بى‏آزار داينه‏

خريدارى چو بابا طاهر لر

خريدارى چون من در لار دينه‏

به روز و شو حضور دار بوين چه‏ها بوين چه‏ها

شه دلّه سوى نور دار بوين چه‏ها بوين چه‏ها

اتي مه حرفه گوش دار اتي شه جا سروش دار

هراس مرگ و گور دار بوين چه‏ها بوين چه‏ها

هميشه ذكر يار دار زبون و گوشّه خوار دار

دو چشّه مثل كور دار بوين چه‏ها بوين چه‏ها

پرت و پلا نأونأو چون و چرا نأونأو

نه زرّه دار نه زور دار بوين چه‏ها بوين چه‏ها

بأؤ خدا خدا خدا تو پادشاه و من گدا

مره به عشق و شور دار بوين چه‏ها بوين چه‏ها

دل هسّ و جاى دلبره نه جاى شخص ديگره‏

شطونّه از خود دور دار بوين چه‏ها بوين چه‏ها

اتي شه سركتى بزن توره نمّه چتى بزن‏

توشه عقل و شعور دار بوين چه‏ها بوين چه‏ها

حسن تو در بروز خود نوين شه خودّه يك نخود

شِ كارّه جمع و جور دار بوين چه‏ها بوين چه‏ها

مه ره در كوه و وشه چنّه خوشه‏

بخورم واش و ولك كوه و وشه‏

نه نومى بورم از اين و از اون‏

نه از خوش و نخوش و ته شه و مه شه‏